مشاهد مرعبة من عاصفة الاسكندرية | تعرض لأول مرة

امبارح، الدنيا اتقلبت في اسكندرية حرفيًا الساعة كانت قربت على 8 المغرب ، والجو بدأ يغير ملامحه ..
ريحة تراب جايّة من بعيد، والبحر اللي دايمًا هادي، بقى بيصرخ ..
ودي كانت صفارة الإنذار ..
حوالي الساعة 1 بعد منتصف الليل كل حاجه اتغيرت فجأة الرياح بدأت حركتها تزيد جدا وظهر غيوم في السما كتير ..
وفجأة
الرياح سرعتها وصلت لـ70 كم في الساعة ، وبدأت تضرب في الواجهات، تخلع يفط المحلات تدمر كل حاجه قدمها ..
والساعة 2 بدأ سقوط مياه الأمطار الغزيرة مع حبات البرد وال استمرت حوالي ربع ساعه ..
العاصفة دي ماكانتش صدفة دي كانت نتيجة حركة كبيرة بتحصل فوق في السما، والسبب الأساسي كان منخفض جوي ضاغط ، جاي من ناحية غرب البحر المتوسط،تحديدًا من عند ليبيا وسواحل تونس،
اللي هناك كان في تصادم ما بين كتلة هوا دافي من الجنوب، وكتلة تانية بردة جاية من أوروبا..
فـ اتكوّن بينهم "منخفض متوسطي" جامد
سحب، ورياح، وبرق، ورعد
واتجه ناحيتنا على طول السحب بدأت تتكوّم فوق البحر،ولما وصلت سواحلنا الشمالية، نزلت بكل اللي فيها مطر، رعد، برق وبرد .
إنما بقى بالنسبة للناس اللي ربطت اللي حصل بالزلزال الحقيقة إن مافيش علاقة مباشرة، لأن الزلازل بتحصل بسبب تحركات في طبقات الأرض مش في السما، يعني ده نشاط تكتوني، العاصفة دي جاية من فوق، من اضطرابات جوية في الغلاف الجوي .
ف علميًا
الزلزال اللي حصل كان مستقل تمامًا عن العاصفة ، مجرد صدفة في التوقيت… بس الصدفة كانت مرعبة ..
خبراء الأرصاد قالوا إن صور الأقمار الصناعية الجديدة بيّنت إن في سحب كتير بدأت تتجمع فوق مناطق واسعة من السواحل الشمالية الغربية ، وأولهم طبعًا .. إسكندرية
وده معناه إن المطر مكمل، وهيكون فيه أمطار رعدية شدّتها هتختلف من وقت للتاني، يعني هتبدأ خفيفة كده ، وبعدين كل ما الوقت يعدي، هتزيد وتبقى أقوى وأغزر .
هيئة الأرصاد الجوية كمان وضّحت إن الجو المُقلِق ده مش هيقف عند حدود إسكندرية بس، ده هيمتد كمان لمناطق تانية في السواحل الغربية والوجه البحري،وممكن كمان يحصل مطر رعدي في حتت متفرقة من جنوب الوجه البحري، ومعاها رياح نشيطة ، احتمال كمان تشيل رملة وتراب ، خصوصًا في مناطق من جنوب الصعيد .
ومن ناحية البحر، الأرصاد طلّعت تحذيرات للملاحة، وقالت إن البحر المتوسط هيكون مضطرب جدًا بسبب الرياح القوية وارتفاع الموج ، ونصحت الصيادين وقادة السفن إنهم ياخدوا بالهم كويس، ويأجلوا أي نشاط في البحر لحد ما الوضع يهدى شوية .
محافظة اسكندرية أكدت انه الحمد لله لا يوجد أي خسائر بشرية .. يوجد بعض الاصابات طبعا .. وخسائر مادية للكافيهات الموجوده على الكورنيش والسيارات وبعض المباني القديمه ال قوة العاصفه وقعت بلكوناتها وشبابيكها..
ف النهاية بنتمنى السلامة للجميع ,, وبندعى ربنا في هذه الأيام المباركة بالخير والسلام لأراضينا اللهم احفظ مصر وشعبها من كل شر،
من كل عاصفة تضرب أرضها، ومن كل بلية تمر بيها اللهم اجعل سماها صافية، ورياحها هادية، واحمي ناسها وأهلها من كل سوء ومكروه
يا رب، احفظ أولادها، كبارها، وقلوبهم من الخوف والضرر،
وأنزل عليهم الخير والبركة في كل مكان
آمين يا رب العالمين ..