اضحك : صندوق الملك سلمان لتنمية العالم العربي

السلام عليكم ايها المشاهدون الكرام ومرحباً بكم في برنامجكم فضفضة.

فيه مثل عند الخليجيين، خصوصاً البحرينيين.

يقولون عن اللي يعطي البعيد ويحرم القريب، أنه مثل (عين عذاريْ).

وهذي عين في البحرين، كانت تسقي النخيل والبساتين البعيدة، بينما اللي قريبة منها ميتة من العطش!

هذا هو حال حكومة خادم الحرمين سلمانكو. مثل عين عذاري.

فلوس الشعب فوق ما هي منهوبة من الأمرا.. الباقي منها يروح برّا، يوزعونه على كل من هب ودب. على الدول وعلى الصحفيين وعلى عصابات العلاقات العامة من شركات وغيره في الغرب.

يصرخ المواطنين يبون سكن، يروح المراخين ويبنون بيوت في دول ثانية: في الأردن، في المالديف، في المغرب، وغيرها.

المواطنين يصرخون: نبي وظايف، يروح المراخين يصرفون المليارات ويوفرون ملايين الوظايف للشعوب الثانية.

يصرخ المواطن: نبي تعليم (ن) زي الناس، يروح المراخين يستثمرون فلوس شعبنا، في الفنادق والمنتجعات وغيرها. وكلها برّا بعد.

ما تصدقون، شوفوا وين يستثمر المراخين الفلوس، اذا قدرتو تعرفون!

الآن، الشباب طاقة تسبودهم من البطالة.

وغير الشباب طاقة تسبودهم من الفقر، بسبب الضرايب. جعل الدب الداشر ينضرب على علباه.

لكن ما فيه وظايف؟

كيف تصير وظايف، والحكومة موقفه مشاريعها كل ابوها؟

الشركات الكبيرة والصغيرة تعاني، وتطرد موظفيها الاجانب والمحليين.

وفي شركات ومؤسسات حكومية توظف الأجنبي ولا توظف السعودي.

وعندكم هذا تويتر اقرأوا لين ما تشبعوا من هالقضايا.

انا كنت قبل مدة حذرت ان هالحال راح يسوي اضطرابات في البلد.

والأمن راح ينفلت، وهو قاعد ينفلت ذا الحين.

الغريب ان جريدتن امريكية توقعت ان تصير ثورة اجتماعية في السعودية، بسبب الفقر والغلا والبطالة.

وهذي كل ابوها موجودة من زمان، بس زادت فوق فوق فوق حدها، في عهد اللئيم ابن اللئيم، ودبّه الداشر ابو رؤية عميا ٢٠٣٠.

انا ادري المواطنين بس يشوفون ان الحكومة تبرعت لهذي الدولة او ذيك، تنبط تسبودهم.

هذا الشي ما كان موجود الاول، مع ان الحكومة كانت تعطي أكثر.

لكن الحين الناس ما تتحمل خبر زي كذا.

انك تعطي تبرعات او فلوس لأي أحد، لأن شعبك في حاجة الى التبرعات.

وتذكرون يا شعبنا المفلس الحزين، ان كثيرين منكم دعا الله: يا رب تتبرع الحكومة السعودية للشعب السعودي!

ههههه

ههههه

هذا كلامكم انتو، مو كلامي أنا. بس هو كلام صحيح.

لكن ال سعود في الأول كانوا يبون يشغلون المواطنين عن السياسة والمطالب السياسية بنثر شوية فلوس.

الحين في العهد السلماني البغيض، يبون يشغلونهم بس بطريق ثاني. بطريق افقار الناس، واشغالهم يوميا بمعاشهم وكيف يدبرون حالهم.

اليوم ناقصنا كذا، وبكرة نتسلف كم ريال، وبعدها ما سددنا القرض للبنك، والكهربا بيفصلوه عنا، ومثل هالكلام.

على فكرة.. وعلى ذكر الكهربا وفواتيرها.

تصدقون ان آل سعود ضغطوا على حكومة قطر، ان تلغي مجانية الكهربا والما عندهم.

يقولون انتو فضحتونا عند شعبنا المسعود المفلس الحزين!

ههههه

ههههه

انا ابي اقول للمواطنين ترا المشكلة مو في الفلوس اللي تعطيها الحكومة لبعض الدول العربية والاسلامية المحتاجة.

ترا اللي تدفعه ما هو بكثير اذا قارنته بالميزانية او باللي يروح في بطون آل سعود بشكل مباشر، او عبر النهب والفساد.

المشكلة ان هالشعب مصدّق ان هالأزمة اللي هو فيها راح تنحل قريب.

وانا قلت لكم واقول.

سلمانكو وابنه يصرفون اليوم بالهبل، على انفسهم وعلى رشواتهم للدول والجماعات والاحزاب والشركات في كل مكان بالعالم.

الصرف ما راح يوقف، والداشر اصلا ما يفكر فيكم، وهو مقتنع بسياسة: جوّع كلبك يتبعك!

اما البطالة فراح تزيد ومستمرة للمتعلمين الجامعيين واللي حاملين ماجستير وحتى حملة الدكتوراة.

الداشر يشتري القصور والجزر واليخوت وانتو اشتغلوا يا حملة الماجستير في ماكدونالد، او طباخات مطازيز في الإمارات، او مثل ذيك اللي تبيع سندويشات على كورنيش الدمام.

والدليل ان سلمانكو يرأف بكم، وان اللي يقوله غانم ما هو بصحيح، وانه ابو الشعب، وأم الشعب، وطبيب الشعب، وصاحب قلب حنون وعطوف.. وان ما يقولونه عن (عين عذاري) ما هو بصحيح.

الدليل هو ان سلمانكو عنده مبادرة.

تقدروا تقولون ان المبادرة صندوق، مثل الصندوق اللي اعلن عنه الملك عبدالله.

بس صندوق عبدالله اللي ما شاف النور، كان للمواطنين.

اما صندوق سلمانكو اللي بيشوف النور، فهو موجه لتنمية العالم العربي.

الصندوق وافق عليه الملك.

وراح يعلنه في شهر ثلاثة ٢٠١٨، وراح يكون الإعلان بحضور الملوك والرؤسا العرب. في قمة عربية في الرياض.

اذا الله أحيانا لذاك الوقت، راح تسمعون سلمانكو يعلن عن مبادرة تأسيس صندوق تنمية العالم العربي.

تخيلوا هالفاشل اللي مو قادر يحل مشكلة بلده وينمّيها، يبي ينمي الوطن العربي كل ابوه.


برنامج الجنادرية مع غانم الدوسري

حساب تويتر
https://twitter.com/GhanemAlmasarir

حساب فيس بوك
https://www.facebook.com/GALmasarir
إيميل
[email protected]
whatsapp:
00447478260630
سناب
https://www.snapchat.com/add/galmasarir